AlbChrome një nga 5 kompanitë më të mira në botë

  • Hits: 906

Revista Metalbulletin ka renditur shoqërinë Albchrome si një ndër 5 prodhuesit më cilësorë të Ferro-chromit në botë. Kjo Revistë me seli në Britaninë e Madhe është revista më e madhe dhe e specializuar në publikimin e informacioneve mbi transaksionet, çmimet dhe arritjet e realizuara në fushën e metaleve, përfshi dhe atë të Ferrochromit.

Ky pozicionim i ri i Albchrome në kategorinë më të lartë të prodhuesve të Ferrochromit në botë, është një sukses i padiskutueshëm që konfirmon edhe një herë angazhimin e kompanisë në rritjen e cilësisë së prodhimit të këtij metali si dhe njëkohësisht e identifikon markën Albchrome si një prodhues i jashtëzakonshëm në nivel global.  Kështu AlbChrome renditet në të njëjtin nivel me kompanitë më të mëdha në botë në këtë fushë.

Investimet

AlbChrome ka realizuar dhe do te vijojë të kryejë me të njëjtin intensitet investime historike dhe strategjike në fushën e metalurgjisë dhe minierave. Investimet kapitale në projekte të reja në Bulqizë por dhe në njësitë e tjera kapin vlerën mbi 30 milion USD. Vetëm në përmirësimin e cilësisë se Ferro-kromit, Albchrome në vitin 2015 ka investuar rreth 3 milion USD.

Në planin e zhvillimit të shoqërisë është edhe ndërtimi i dy furrave të reja në Uzinën e Përpunimit në Burrel me një vlerë prej më shumë se 6 milion dollarësh.

Eksportet

Albchrome për 7 mujorin e parë 2015 ka eksportuar mbi 4 Mld Lekë ose 10% të totalit të të gjitha mineraleve të eksportuara nga Republika e Shqipërisë.
Krahasuar me të njëjtën periudhë të vitit 2014, eksportet e Albchrome në vlere janë rritur me 41.5%.  Ndërkohë eksportet e mineraleve në 7 mujorin e parë të vitit kanë rënë me 12 Miliard ose rreth 24%.

Albchrome aktualisht zë 4% të gjithë eksporteve Shqiptare.

Kompania AlbChrome, e dhënë në formë koncesioni nga shteti Shqiptar prejt vitit 2001, aktualisht përbëhet prej Minierës së Kromit Bulqizë, Uzinës së Ferrokromit Elbasan, Uzinës së Ferro-kromit Burrel si dhe Impiantit te Seleksionimit Klos..

AlbChrome prodhon ferro-krom me karbon të lartë të një cilësie ‘premium’, duke e renditur këtë produkt Shqiptar si nga të paktët prodhime 100% vendase të një cilësie shumë të lartë dhe nga produktet më të dëshiruara në treg. AlbChrome është aktualisht kompania e dytë eksportuese më e madhe në vend, duke eksportuar në vende Europiane (përfshirë Italinë, Gjermaninë, Belgjikën etj), në Shtetet e Bashkuara të Amerikës, dhe së fundmi edhe në tregun Asiatik (Japoni dhe Kore e Jugut). Albchrome aktualisht ka më shumë se 950 punonjës. AlbChrome është pjesë e grupit Balfin prej vitit 2013.

(m.k/BalkanWeb)